“Jy moet vorentoe beweeg in die lewe”.
Dit, volgens Ton Vosloo, is die motto wat nie net hom persoonlik nie, maar ook Naspers, die maatskappy wat hy dekades lank bestuur het, verseker het van ʼn standvastige plek in die dinamiese politieke en media landskap in Suid-Afrika.
Ton Vosloo op die stoep van die huis waarin Naspers gestig is. Foto: Mike Wright
Vosloo, een van Suid-Afrika se deurwinterde politieke joernaliste voordat hy die skuif na die bestuurskant van die media-wêreld gemaak het, het in gesprek met prof. Lizette Rabe, dosent by die Universiteit van Stellenbosch se joernalistiek-department, ervarings en lesse gedeel uit sy lang loopbaan wat volgens hom vandag nog steeds belangrik is.
Na aanleiding van die titel van Vosloo se memoir, Oor Grense- ʼn Lewe in die media in n tyd van verandering, het die gesprek gehandel oor die grense wat beide Vosloo asook Naspers moes verskuif om te relevant te bly in ʼn tydperk van politieke sowel as tegnologiese vernuwing in Suid-Afrika.
“Naspers het min geld gehad, maar daar was altyd ʼn bereidwilligheid om hernuwing te ondergaan,” het Vosloo gesê.
Ton Vosloo en prof. Lizette Rabe. Foto: Courtney Williams
Vosloo het ook ander hoogtepunte uit Naspers se geskiedenis uitgelig, soos die stigting van Beeld en Rapport, wat na sy mening instrumentaal sou word in die bevordering van die “verligte beweging” onder politieke joernaliste van daardie tyd.
Vosloo het ook erkenning gegee aan Koos Bekker, huidige voorsitter van die Naspers-raad, vir sy rol in die tegnologiese vernuwing wat die maatskappy ondergaan het.
“Ek het ʼn oproep gekry van hierdie MA-student by Columbia Universiteit in New York genaamd Koos Bekker, en hy het gesê hy het ʼn antwoord op my dilemma; betaal-kanaal-televisie,” onthou Vosloo.
Uit hierdie gesprek en die wat daarop gevolg het is MNet gebore, Suid-Afrika se eerste betaal-om-te-kyk kanaal. Dit sou later ontwikkel en die maatskappy MultiChoice tot stand bring. Vandag is MultiChoice aan die stuur van die grootste satelliet-televisiediens in Afrika suid van die Sahara. Dit het vroeër hierdie week op die Johannesburgse handelsbeurs gelys.
Volgens Vosloo is daar nog baie grense wat huidige joernaliste in die gesig staar, maar hy het verwys na die gesag van die Suid-Afrikaanse grondwet en die vryheid van die pers wat daarin verseker word as die “heiligdom” van die media-wêreld.
“Ons as joernaliste moet die grondwet gehoorsaam, die vryheid bewaar, maar moet ook versigtig wees om nie daardie vryheid te misbruik nie,” het Vosloo gesê